هل استطيع العيش في تركيا وماهي المصاريف ؟
اليوم راح اشرحلكم بالتفصيل العيش بتركيا وانته على ضوء هاي تفاصيل جيك أمورك وقرر تفيدك العيشه او لا و تكدر ادبرهه لو لا ؟
بدايه دخولك لتركيا بغض النظر عن مصاريف الفيزا والطيران راح اتكلم عن تركيا فقط
عند وصولك لتركيا عندك خيارين للعيش بتركيا
1- اقامه سياحية
2- تقديم UN
اذا أقامه او يوان راح من توصل أنقرة او إسطنبول اذا عائله استأجر شقه يومي لان ارخص من الفندق وتصرفلك هوايه اغلب الشقق اجار يومي كمعدل ايجارها تقريبا ( 150 ليرة او200 ليرة )
- اذا تقدم UN تراجع انقرا وتشوف أي محافظة مفتوحة وUN يقرر
- اذا تريد اقامه راح اتكلم بغير منشور عنها وبالتفصيل حتى الكل يشوفه ويستفاد
تأجير_الشقة
من تاجر الشقه تدفع تأمينات ودلاليه واجار البيت
يعني اول شهر مثلا أجرت شقه ب 700 ليره تقريبا يعني ورقتين تدفع عليهه تأمينات 700 ليره ودلاليه 700 ليره
يعني نكول 200 دولار اجار و200 دولار تأمينات و200 دلاليه
المجموع = 600 دولار ( هاي تدفع اول شهر من تاجر )
بعدهه تدفع بس لاجار والفواتير
فاتورة الماء تقريبا 20-100 ليره ملاحظة :- حسب الصرف اذا كنت عازب او عائلة
فاتورة الكهرباء تقريبا 50_150 ليره ملاحظة :- حسب الصرف اذا كنت عازب او عائلة
فاتورة الغاز تقريبا 20_50 ليرة بصيف وشتاء توصل 200 اواكثر حسب استهلاك
وايظا ممكن يكون اتفاق بينك وبين صاحب الشقة بان يكون الفواتير باسمك يعني تستطيع تحويلهن باسمك من الدوائر (الماء ، الكهرباء ، والغاز ) فقط يطلبون منك تأمينات
طبعا اذا ماء وكهرباء والغاز ممفتوح تدفع تأمينات وتفتحهن
تأمينات الغاز ما يقارب 460 ليره
تأمينات كهرباء ما يقارب 200 ليره
تأمينات الماء ما يقارب 160 ليره
هاي تأمينات من تطلع من الشقه ترجعلك ✔
واذا كلشي مفتوح بشقه هاي من ظمن التأمينات الدافعها بشقه
يعني مصروف اول شهر تصرف بين فندق كم يوم واجار شقه ومصرف طريق والأكل وشرب كلهه
تقريبا تسوي 1000 _ 1500 دولار
حسب مصرفك وحسب اقتصادك وحسب عدد العائلة وحسب اجار الشقه واذا كانت مفتوحه ومابيهه تأمينات
اني خليت زايد مو ناقص حتى محد يتفاجأ بعدين
طبعا بكل تركيا بأي محافظه كمعدل شقه ب 200 دولار حتى بالمحافظات سياحيه
والمحافظات العاديه بـ 100 و 150 دولار
احنه نكول كمعدل كل شهر 200 دولار هيه والفواتير وهاي اقل شي طبعا اذا شقه زينه دوار غاز
الماركت_والغذائية
الغذائية بصورة عامه لايوجد اختلاف عن العراق كثيرا يوجد شغلات نفس أسعار العراق ويوجد شغلات اغلى بشي بسيط ويوجد ارخص
يعني لا تخاف من الي يكول غاليه واسعارهم بالنار كله جذب بجذب لان هوه يحسب ع الليرة يشوف لأسعار غاليه بنظره بس هي نفس أسعار العراق
طبعا تروح تتسوك الغذائيه من ماركت مخصص ومدعوم من الدوله واسعاره رخيصه ارخص من باقي المحلات
أسماء الماركت الرخيص
101
BIM
ŞOK
هاي كلشي تلاكي بيهن غذائية خضراوات مواد منزليه وغيرهه من هاي سوالف
البازارات_والخضراوات
الخضراوات والفواكه يتم شرائها من البازارات وكلمة بزار يعني سوق بالعربي هاي اسواق متنقله يبيعون خضراوات وملابس ومواد غذائية ومواد منزليه وبأسعار مناسبه ورخيصه
ويوجد بازارات مستخدم يبيعون غراض واجهزه كهربائيه مستخدمه ورخيصه ب 5 ليرات و10 ليرات هيج أسعار فرق هوايه عن الجديد بس افحص قبل ما تشتري
طبعا المعروف عند العراقيين كل أسبوع يتسوق من البازار وخاصه الغذائيه والأشياء البسيطه من BIM او 101
تقريبا خضراوات وغذائية للعائلة 5 نقرات كل أسبوع 100_150 ليره يعني كل أسبوعين 100 دولار
هذا كسعر تقريبي اكو ناس يجوز اقل واكو ناس يجوز أكثر
يعني اذا مثل ما حسبت بالشهر تحتاج 200 دولار
كمصرف ونحط 100 دولار زياده نكول اذا شخص يجيب لحوم وحلويات وهاي سوالف
يعني مصروف الشهر صار 300 دولار
ملاحظه :- بهاي الحاله صار لاجار مثل ما حسبنه 200 دولار وصار المصروف الشهري للأكل والشرب 300 دولار
يعني مصرفك بالشهر 500 دولار او400 دولارحسب صرفك اجار وأكل وشرب ✔
طبعا اذا متعرف تصرف وكلشي تشوفه تشتري 1000 دولار يجوز ميكفي بالشهر
اتمنى اكون وصلت الفكرة بابسط صورة ومثل ما موجوده بالواقع
اي استفسار انا حاضر أو ابعث رسالة او اكتب هنا بالتعليقات
ليست هناك تعليقات:
إرسال تعليق