انت لاجئ اين ما كنت هذة المعلومات تهمككل ألاخبارلاجئي تركيا
أنواع المقابلات من لحظة التسجيل الى الطيران ..UN
السلام عليكم ورحمه الله وبركاته
طبتم وطابت اوقاتكم بالخير والبركهقبل مااشرح اخوان اعتذر على طول الموضوع، لكن للأهميه صار بهالحجم.....فتابعوا القراءه
اكثر اللاجئين يحير ويسال عن المقابلات
وتخلف طبيعه المقابلات من قضيه لاخرى ومن شخص لاخر
حسب القضيه والاحداث
واغلبهم يسالون ليش فلان قابلو هيج واني لا
لذلك كتبتلكم عن
"انواع المقابلات من لحظه التسجيل لحين السفر بأذن الله"
اخواني سوف نشرح لكم نبذه مختصره عن فكره اللجوء قبل تفصيل انواع المقابلات وشرحهاا
طبعا سواء كنت بتركيا او اي دوله ثانيه يوجد بها مكاتب الامم المتحده
ك
اليمن . الاردن . لبنان . مصر . الهند . ماليزيا . تركيا ..الخ
انت من حقك بهذة الدوله ان تقدم وتسجل بهذة المكاتب اذا كنت صاحب قصه او قضيه دفعتك ان ترك بلدك
وتلجأ الى حل ثاني وهو التسجل عند مكاتب الامم المتحده لغرض حل مشكلتك في حال وجود مشاكل في بلدك وتعجز دولتك ان توفرلك حل لهاي المشكله
لكن احب ان انووه على نقطه مهمه
يجب اثبات تهديد واقع عليك وعلى عائلتك وعلى حياتك
من جهه معينه بغض النظر عن حال البلد الي خرجت منه
( وسيتم توضيح هاي النقطه بالتفصيل في موضوع القصص لي سوف اقوم بنشره لاحقاا ان شاء الله)
طبعا وع اساس هذا التسجيل حتكون اقامتك مجانيه داخل الدوله الي سجلت بها لحين سفرك
هسه نبدي بسم الله وع بركه الله بانواع المقابلات
👇👇👇👇👇👇👇👇
● 1
* مقابله التسجيل
وهي المقابله المشتركه لجميع الاشخاص طالبي اللجوء والمقدمين ع مكاتب الUN في كل الدول وتكون متشاابه بين كل الاشخاص
سواء عائله او ولد شاب او بنيه وحدهاا
بالنسبه لتركيا التسجيل حصرا في انقره
اي شخص اول ميجي يسجل بانقره
حيكون حاله حال الباقين بالتسجيل وللتنبيه لازم الكل يحضر بمقابله التسجيل مهما كانت الحاله حتى الطفل لي عمره ساعه هم يجيبو
حيدخل الشخص جوه لقاعه الانتظار حيكون عنده رقم تسجيل على التسلسل
وبعد ميوصل رقمه
حينزل عليه موظف الى قاعه الانتظار
حياخذه فوك لغرفه التسجيل
طبعا الموضوع يشمل العوائل والشباب
بعدها حيبدي موضف التسجيل يطرح الاسئله الروتينيه
اسمك
عمرك
الحاله الاجتماعيه
الديانه
الطائفه
التحصيل الدراسي
تملك ملف او تقديم سابق
سبب الخروج
ويطلب رقم تليفونك
حتى ينزله بالسستم يمهم
وهاي نقطه مهمه نبهت عليها سابقاا
انهو كل شخص قبل ذهابه الى التسجل لازم يشتري سيم كارت
تركي ويكون عنده رقم خاص بي حتى يحتفظ بي ويكون هو وسيله التواصل بينه وبين الUN
بعدهاا حياخذولك صوره الكترونيه طبعاا عن طريق الكامره
وحيكلك وين تريد تروح يامحافظه
طبعا اذا عندك اقرباء درجه 1 حينطوك محافظتهم حتى لو مغلقه
واذا ماعندك انت مجبور ان تختار من ظمن المحافظات المفتوحه
بعدها حيكلك تفضل انتظر جوه بالقاعه
لحين اتمام اجراءات التسجيل
بالعااده تنتظر اقل النصف ساعه ينزل الموظف يوزع اوراق التسجيل
بيها معلوماتك وبيها سنه المقابله (اغلب المواعيد وهميه)
وبيها اسم محافظتك
بعدها تتوكل وتذهب الى محافظتك ماعندك بعد شي بانقره
- تروح لمحافظتك تسجل أمنياتك وتكعد تنتظر رحمه رب العالمين
👇👇👇👇👇👇👇👇
● 2
* المقابله الفوريه
هي مقابله فوريه بنفس يوم التسجيل
لكن لبعض الحالات وهي نادره وقليله جدااا
من ينزل الموظف يوزع الاوراق اكو شخص محينطي الورقه
حيكلوله انتظر
حيصعدوا مره ثانيه فوك لغرفه ثانيه
حيلاكي موظفين او ثلالثه طبعا هم بالحقيقه مو موظفين عاديين مختصين بالتسجيل فقط
هذوله محامين وقانونيين يعني درجه اعلى من لي سجلك
حيكونون اما من جنسيات اجنبيه او اتراك واكو مترجم كاعد وياهم حيبدي يترجم اسالتهم الك واجوبتك الهم
طبعاا هاي المقابله تكون لبعض الحالات
مثلاا...
* اصحاب الملفات السابقه بدول ثانيه وقصصهم واحداثهم كانت قويه
* اصحاب القصص القويه جداا والظرر 100%
مثل ماحصل ويا احدى الاخوات بستهداف منزلهم بالعبوات والمتفجرات
* بنات مهزومات من اهلهم( مو الكل)
* حالات مرضيه بنسب عجز واضح وصاحب المرض يعاني من مظاعفات ومؤكد بتقارير طبيه
مثلا حاله حصلت ونقلها احد الاخوه جزاه الله خير
"ولد ايزيدي زوجتة منطية الكبد متبرعة بي لبنتها وعايشي على العلاج يعني قطعة من الكبد ها مباشرأ سولهم مقابلة"
* اصحاب القضايا والقصص الغريبه
كقصص الاغتصاب والتحرش او ماشابه
* اصحاب القصص الموثقه بالتهديدات المصوره بالفديوات والاتصالات والكتب الرسميه والتهديدات
للعلم..
يتم تسجيل المقاطع وسحب كل الفديوات لغرض التحقيق من صحتهاا
* بعض من اصحاب التقديم السابق وواصلين مراحل منتهيه من الاجراءات (بعض الحالات وليس الجميع)
* اصحاب القضايه السياسيه
مده هااي المقابله تكون من ساعه الى ساعتين
طبعا هاي اللجنه كلش حبابين وطيبين وحيل حيل متعاطفين يكونون ويا صاحب القضيه
لان هم يردون يفهمون وضعه اكثر وبصوره تفصيليه ادق
طبعاا طبيعه هاي المقابله
حيدخلون واحد فقط من العائله اما الزوج او الزوجه
حيبدون يوجهوله اسأله معينه
اذا كان من اصحاب الملفات وتسجيل بدوله ثانيه
حيبدون يسالوك اغلب الاساله عن ملفك ووضعك القديم بالاضافه الى سبب خروجك حاليا
مايقارب ال15 الى 20 سؤال حيتم توجيهاا الك وانت لازم تجاوبهاا بشكل توضيحيهي
وبهاي الفتره الموظفين يكتبون ويسجلون معلوماتك واجوبتك ع شكل تقرير
يرفع لاحقا للامم المتحده
من ظمن الاسئله المطروحه بهاي المقابله
يرجى الملاحظه انهو مو كل تهديد مكتوب لو مصور حيجرون وياك هالمقابله
في حاله وجود الزوج ويتم مقابله الزوجه
من اهم الاسئله لي حتتوجه لزوجه
* تظنين زوجج اله يد بالموضوع لي خرجتو بي حاليا
* علاقتج بزوجج شلونها
* زوجج يضربكم
* عندج ثقه بزوجج
* تشعرين بان زوجج يكدر يحميج
-*-*-*-*-*-*-*-*-*-*-*-*-*-*-*-*-*-*-*-*-*-*-
👇باقي الاسئله المشتركه للزوج او الزوجه👇
* شلون جيتوا (طيران / سياره)
* من وين دبرتوا الفلوس السفر
* دخولكم كان بصوره رسميه او لا
في حال الدخول بطريقه غير رسميه (تهريب)
- منو الشخص الذي هربكم
- كيف تعرفتوا عليه وشلون التقيتوا بي
- شكد المبلغ لي سلمتوا اله
- الطريق شلون كان
* اي دوله تحبون تروحون الها اكو دوله محدده
الجواب ع هالسؤال
يكون كالاتي....
اي دوله تحفظ حياتنا وتحفظ كرامتنا وتظمن مستقبلي ومستقبل اولادي بعيد عن العنف والقتل
اني موافقه او موافق عليهاا
* في حال العوده الى بلدك شنو تتوقع يصير.؟
* هل تنون البقاء في تركيا..؟
الجواب يكون كالاتي..
الشخص او الجه لي سوت بيناا هيج موجوده لحد الان بالعراق
وتركيا دوله قريبه من العراق ومن الممكن ان يوصلونا هنا اذا عرفوا بينا واحنه بعد لي جرى علينه ولي صار تعبت نفسيتنا وصرنا نخاف من كلشي
فاتننى ان تلكونه انتو الحل المناسب بعد ماشرحتلكم وضعي وحالتي
* دراستكم او وظيفتكم بالعراق والدوائر او الجامعات لي درستو او خدمتوا بيها
* السؤال ع سنوات وتواريخ مهمه للاحداث
كالتهديد والانفجار والخطف الى اخره من الاحداث لي بالقصه مالتكم
* هل تحتاجون علاج طارىء حالياا
هل احد من افراد الاسره يحتاج علاج طارىء
* الامراض لي تعانون منهاا
* مورد العيش حاليا من اين وكيف
* الاشخاص لي هددوكم تعرفون اسماءهم اي جه او تنظيم او حزب ينتمون
* احد يعرف بيكم انتو تهددتوا وسافرتوا
هاي اهم الاسئله لي حتتوجه لشخص لي حيجرون وياا هاي المقابله
مو شرط كل الاساله حتتوجه لكل للاشخاص لكن الاسئله من ظمن الي ذكرتها
بعدهاا يكلولكم ايظا انتظروو قرار اللجنه
من المحتمل ان يجروون بعد هاي المقابله الفوريه الثانيه
مقابله ثالثه (مو للكل نسبه قليله جدا)
فقط التاكيد ع سؤال او سؤالين ومطول تقريبا
من 15 الى 20 دقيقه
حياكدون ع التواريخ والسنوات وقصه التهديد
بعد هالتعب والانتظار والاسئله ..
حيسلموكم ورقه التسجيل
وحيطلبون منكم ان ترسلون كل تقاريركم واثباتاتكم ع ايميل المنظمه مره ثانيه
وحيكلولكم انتظروا تليفون قريب وبالفعل اصحاب هاي المقابلات يقابلون بوقت قريب
بالنسبه للموعد لي سيعطوكم ايا مو شرط يكون قريب
احتمال من 2027
لكن سبق وان وضحت الموعد وهمي
هسه شنو الفائده من هاي المقابله وشنو سلبياتها وايجابياتهاا
طبعاا الفائده من هااي المقابله انهوو دعم وتلخيص لحالتك واختصار لقصتك
وايظاا اختصار بفتره دراسه الملف لاحقاا (قسم القانونيه)
بالاظافه لذلك ويتم ادراج ملفك ضمن الملفات المهمه
في حال ارسال شكاوي او فاكسات او تقارير طبيه اظافيه
سوف يتم تسريع في مقابلتك
نصيحتي لاصحاب هاي المقابلات...
ان تكتبون اجاباتكم والاسئله الي حتتوجه الكم بالحرف الواحد وبأدق التفاصيل ع بورقه وتحفظوهاا
لان هاي الاجابات حتنسألون عليها
بكل المقابلات الاحقه ...
● 3👇👇👇
* المقابله الامنيات في المحافظه (مقابلة الافاده)
هاي المقابله تكون بعد متوصل لمحافظتك
اما بـ اسبوع او شهر او عده اشهر واحتمال اصلا تسافر وميسولكياا
طبعا هاي المقابله عباره عن معلومات بسيطه
حياخذون
* اسمك
* عمرك
* حالتك الاجتماعيه
* تاريخ دخولك الى تركيا
* طريقه الدخول ( رسمي/تهريب)
* وسبب قدومك الى هذة المحافظه ( اذا عندك احد بيهاا)
* سبب طلبك اللجوء (القصه)
اخواني هناااا هوايه يسألون على هاي النقطه الاخيره
يقولون كيف احنا محجينا قصتناا كامله
او احنه حجيناا قصه تختلف عن القصه المذكوره بالمقابله مال فسفوره
فشنو الحل...؟
اخوان اولا بالنسبه الي مكلمي كل القصه بالتفصيل فشي عادي وليخاف ابد لان هاي اسمها افاده تابعه للامنيات
الهدف منهاا
يعرفون انت شنو سبب جيتك لتركيا يعني وضعك الامني شنو يخوف لو لا بالنسبه لمحافظتهم
انا بالنسبه للاخوه لي حاجين بهاي الافاده شكل وبعدين مقابلين وحاجين قصه ثانيه ويسالون ع موقفهم
فلاتخافون ..
تكدر بعدين بالمقابله تشرحلهم وتفهمهم انهو انت كنت خايف وانهو متحب احد يطلع على قضيتك غير الامم المتحده لان انت عندك كل الثقه والامانه بهاي المنظمه انهو تقدملك كل سبل الحمايه
فهاي مسأله بسيطه وان شاء الله متستوجب الخوف بالنسبه للي ذاكرين قصه بالافاده وذاكرين قصه ثانيه بالمقابله
غالبا ميطلبون منك الافاده (قصتك) مكتوبه بورقه اثناء التقديم
وتكون مقابله الافاده بالامنيات غالباا ويا صاحب الملف فقط يعني لايوجد داعي للعائله كلهاا
لكن نصيحتي الكم ان خابروكم ع افاده ان تحجون قصتكم نفسها لي جايين بيها مال مقابله الاولى هاي اسلم حل الكم
لان في بعض الحالات (نادراا)
تكون هناك لجان خاصه من قبل منظمه الUN
تتوجه للامنيات المحافظه تطلع ع بعض الملفات
● 4👇👇👇
مقابله لجنه خاصه في مكتب اسام (لجنه ممثله من الUN)
هاي الحاله تصير ويا بعض الاخوه
خصوصا اصحاب الحالات المرضيه (اطفال بالدرجه الاولى)
مثلا انت يوميه ترسل تقارير ودزها بفاكس للمنظمه
بس انت جاي بالجديد يعني مصارلك هوايه (اقل السنه)
ومنطيك موعد بعيد بس انت من ددزلهم التقارير الطبيه ديشوفون حالاتك والنتائج متبشر بخير
لذلك سوف يتصلون عليك يكلك عيني عندك بفلان تاريخ موعد بفلان محافظه بمكتب الاسام بكذا وقت تروح عندك مقابله
واكيد حتروح انت وحدك او مع الشخص المريض
لايوجد داعي للعائله كلهاا
حتلاكي لجنه حتسوي وياك مقابله مدتها مختلفه حسب قضيتك وقصتك
وحيسالوك عن الحاله المرضيه وشنو قصت تهديدك ويستنسخون التقارير
ويكلولك انتظر تليفون احنه حنرفع هاي المقابله لي سوينهاا معاك الى لجنه الدراسات وان شاء الله نخابرك
طبعا هنا اذا درسو وضعك وشافو حالك تعبان
حيخابروك ع مقابله قريبه حتى لو جان موعدك بعيد
ملاحظه...
ممكن ان تشمل هاي المقابله بعض الاخوه لي قابلو وعدهم فسفوره لكن تكون مقابلهم الهم من لجنه خااصه للملف
خصوصا لي مشتغلين ويا الامريكان
وهاي الحاله صارت مع اخوه واصدقاء 2 عدهم فسفوره لكن اتصلوا بيهم وحددولهم موعد مقابله بأحدى المحافظات مع لجنه خااصه صوروا كل مستمسكاتهم واخذو شرح مفصل اظافي عن قصتهم
وللعلم الاخوه ملفهم بقسم الاستيطان وكانو مترجميع مع الامريكان
● 5 👇👇👇
مقابلة الفسفوره (حجر الاساس)
طبعا هااي المقابله هي كلش مهمه ع ضوئها حيمشي ملفك وتبدي خطواتك نحو الهدف ان شاء الله
هنا حتكون اما في انقره او محافظه ثانيه قريبه منك او في محافظتك نفسهاا
هنا حتحجي قصتك بالتفصيل مع الادله
طبعا العائله ملزمه جميعااا بالحظور بالتاريخ المحدد
وحتكون المقابله مع
الزوج والزوجه والاطفال ولي فوك 18 سنه ايظاا ينسال
طبعا بعد متخلص المقابله حتكون النتائج..
* قبول فسفوره
* اعادة مقابله
* مقابله تكميليه
● 6 👇👇👇
مقابله الباحثه الاجتماعيه
هاي المقابله تكون بعد مقابله الفسفوره
تكون خاصه بالنساء لي من دون ازواجهم والاطفال
مثلا
امرأة مطلقه
متوفي زوجها
معتقل او مفقود
سوف يقومون بعمل معها ومع اطفالها مقابله تكون بمصلحتها وتدعم ملفها
يعني حيخابروها بعد متستلم الفسفوره وتروح او حتى اذا منطوها فسفوره
حيطلبون منها ان تجي هي وطفالها الى انقره طبعا الاجره مال نقل ع حساب المنظمه
حتجري وياهم لجنه خاصه اما رجل او امرأة
مقابله كلش مهمه ومصيريه حتى يعبر الملف الى الاستيطان
ويكون هذا الشخص مختص بهيج امور
حيسأل المرأة عن حالتها النفسيه
عن وضعها بعد فقدان زوجهاا
شلون عايشه
هل تجيها حواله ...الى اخره من الاسئله الثانويه والروتينيه
وبالنسبه للاطفال
حيعتمدون كلامهم
حيسالوهم مثلا
ابوكم وين بالعراق
ابوكم يخابركم
تحبون ابوكم
كيف كان معاملة ابوكم معكم
اظافه الى اسئله اخرى
مثلا هنا المرأة قالت زوجي مفقود حيشوفون اجوبه الطفل شنوو
وهذا الموضوع حشرح عليه بشكل تفصيلي اكثر ان شاء الله لاحقاا
مع بعض الملاحظات المهمه
تفيد الاخوات لي عدهم اطفال وجايين بدون ازواجهم
● 7 👇👇👇
مقابله اللجنه الطبيه
هاي المقابله تكون حسب طلب الشخص او اللاجىء
مثلا انت دتعاني من مرض ودشوف ماله حل من دتراجع المستشفيات لي بمحافظتك
فتتصل بالمنظمه او تخاطبهم عن طريق مكتب اسام بمحافظتك تطلب منهم ان يحولوك ع طبيب او مستشفى تابع للUN
طبعا مالها اي علاقه اذا جنت مقابل ومستلم فسفوره او ممقابل
هم حيرجعون يحجزولك موعد ويبلغوك بي
انت تروح لمكتب اسام لي بانقره (مقر التسجيل)
النقل مدفوع (مجاني)
وحيطلع مترجم مجاني معاك
ياخذك للمستشفى ويكشفون ع حالك
واذا شافو وضعك مدهو حيبقوك وتستمر المعاينه والعلاج
طبعا وكله مجااني
طبعا هاي النقطه مو لاي حاله مرضيه مجرد متكلهم اني مريض ياخذوك يودوك
طبعا اكيد حيندز بعد ذلك تقرير بحالتك للUN
● 8 👇👇👇
* المقابله الماليه
غالبا ماتكون مع مقابله الفسفوره او بعدهااا
وتكون بطلب من الشخص نفسه
تكون مقابله سريعه
حيسالوك عن ..
اجارك
فواتيرك
عندك حواله او لا
تعاني من مرض او لا
بعض الاسئله الثانيه بخصوص قصتك
بعدهاا تجيك لجنه للبيت تشوف وضعك وحالتك وتصور
بيتك وتصور تقاريركم الطبيه واذا عدكم رساله تحبون توجهوها للمنظمه
ويروحون
ع اثر هاي المقابله او الزياره حيدرسون وضعك
ويحددولك راتب اذا تستحق
ملاحظه
حاليا صار بامكانك ان تتصل ع قسم الماليه او تراسلهم ع ارقام الفاكس
وتطلب منهم ان يسجلوك عدهم وهم ييشوفون وضعك
ارقام الاتصال..
03124097006
الاربعاء بعد الظهر يكون الاتصال
او المراسله ع الفاكس
03124097004
كل الاوقات تكدر ترسل فاكس
● 9 👇👇👇
* مقابله ال ICMC
"الكنيسه الكاثوليكيه"
في حاله حصولك ع الاستيطان بعد مقابله الفسفوره وجان استيطانكم امريكا
فحتكون عندك مقابله الICMC باسطنبول
طبعا هي مقابله بسيطه ومتخوف عادة اسهل من مقابله الفسفوره
الغرض منها ...
تهيئه الشخص والملف لمقابله المحلف
يكون الحظور بعد تحديد موعد واللاتصال على الشخص والحظور للعائله بالكامل
وسيتم الشرح عن طبيعه هاي المقابله لاحقاا
في مقال مفصل مع ذكر كيفيه التسجيل بموقع الICMC
وماهي فوائد هاي المقابله للشخص
فاتمنى ان تابعون لحين النشر
ملاحظه..
في حال حصول الشخص على استيطان
كندا او استراليا فلايوجد مقابله الICMC حيعوض عنها بالفورماات بعدها تقابل بالسفاره مقابله السفير..
اما دوله برطانياا
فاصلا لايوجد مقابله باغلب الاحيان يكون الاتصال هو الوسيله الوحيده لتواصل والسؤال عن المبهم من القصه
وفي بعض الحالات يدزون ع الشخص لانقره يسون ويا مقابله
● 10 👇👇👇
* مقابله الحلف الامريكي (الوفد)
هاي المقابله خاصه بلي عنده استيطان امريكاا
وتكون بعد مقابله الICMC
حتكون هاي المقابله المصيريه والحاسمه
هي لي تحدد اما تعبر للفحص والدوره التثقيفيه او يتم رفض قضيتك حسب القصه
ايضااا حوضح طبيعة هاي المقابله بالشرح المفصل لاحقاا ان شاء الله
اظافه الى موضوع القصه
وبنود الرفض
بالامثله والادله لبعض الاخطاء من بعض الاخوه اثناء المقابله
فتابعوا ان شاء الله باقرب وقت انشر الموضوع
اما مايخص دول كندا واستراليا
فتكون مقابله سفير بالسفاره مثل موضحت سابقاا
● 11 👇👇👇
* الفحص الطبي..
سيتم توضيحه بالشرح بمنشور مفصل مع الامراض
لاحقاا بأذن الله فتابعوا الكروب باستمرار
● 12 👇👇👇
* الدوره التثقيفيه...
سيتم الشرح عنها لاحقااا
وعن الامور المسموح ان تاخذها وياك بالجنط والاوزان
وبعض الامور المهمه لي تفيدك ان تشتريها منااا
فخليكم متابعين معنا
● 13👇👇👇
* الجكش واجراءات المغادره
أيظا سيتم الشرح عنها بالتفصيل الممل لاحقاا
فتابعوا معنا
هااي كانت مسيره حياة اللأجىء من اول لحظه يدخل بيهاا لمقر التسجيل
الى ان يستلم الجكش بيده ويوصل المطار ويتوكل ع الله ويصعد بالطياره ويتوجه للدوله لي يتمناها
الله لايحرمكم هاي اللحظه
بعض الاسئله المهمه 👇👇👇 اقره واستفاد ....
س.⚘
بالنقطه 1 (التسجيل)
العائله يدخلون كلهم سوه لو شلون..؟
ج..
اي نعم كلكم يدخلون سوه ..
س..⚘
يوجد رفض بمقابله التسجيل..؟
ج..
لايوجد رفض بمقابله التسجيل .. فقط تسجيل
س...⚘
بمقابله التسجيل من نفوت هم يسألونا ع قصتناا ونحجيهاا كلها..؟
ج..
لا مجرد سبب خروجك تذكر مثلا تم تهديدي
لكن بحاله ان يسولك مقابله فوريه نقطه2
هنا حيسالوك عن القصه
س...⚘
يطلبون مني صور واثبات بمقابله التسجيل
ج...
لا
س..⚘
يصير اجي اسجل وحدي بدون اهلي ..؟
ج..
نعم ممكن يسجلوك عادي
س..⚘
التسجيل مجاني ..؟
ج..
اي نعم مجاني
س..⚘
المقابله الفوريه اذا محجيت كلشي بيهاا يصير احجيهاا بمقابله الفسفوره باقي الاحداث
ج...
عادي يصير لان هم حيركزون مو ع كل القصه عدهم كم نقطه حيسالوك بيها من قصتك
س..⚘
المقابله الفوريه يصير ارفظها وماسويها ..؟
ج..
يصير بس مو بصالحك ابد
س..⚘
مقابله الامنيات تفيدني بشي..؟
ج...
اذا ام الافاده متفيدك
بس اذا جايه لجنه من الامم المتحده اكيد تفيدك
س...⚘
يوجد رفض بمقابله الفسفوره
ج...
موجود بنسبه اقل من 1%
للي ميثبت واقعيه قصته والخطر لي على حياته
وسوف اوضحها لاحقاا ان شاء الله بمقال ثاني
س..⚘
مقابله الفسفوره يصير اضيف احد
ج...
نعم
س...⚘
ممكن ان تنعاد مقابله الفسفوره مرتين
ج...
اي ويمكن 3 لكن بحالات قليله
س...⚘
مقابله الباحثه الاجتماعيه مهمه
ج...
جدا مهمة
س...⚘
ممكن ماذهب لمقابله الباحثه الاجتماعيه
ج ..
لا ميصير
س...⚘
اذا صارت عندي اضافات على احداثي واني سجلت وقابلت فسفوره
ج...
تكدر تضيفها بمقابله الICMC
وحوضحها لاحقاا مقابله الICMC
س...⚘
قدمت على المقابله الصحيه ( موعد مستشفى)
ولم اذهب يصير..؟
ج...
يصير بس ليش حجزت اصلا انصحك روح
ولاتقلق ايظا يعطوك الفلوس مال باص
س..⚘
ممكن ان تتأجل مقابله الفسفوره لموعد ابعد من وقتهاا..؟
ج..
نعم لكن نادرا متصير وحتى وان صارت فلا يتم تأخيرك كثيرأ
س...⚘
مقابله الICMC بيها اعاده
ج...
لا
س...⚘
ممكن يرجع الملف بعد مقابله الICMC الى الUN ويرفض
ج...
اي بس حالات قليله جداا
س...⚘
شكد المده بين المقابلات
ج...
ممعلوم ابد ولا تسال احد عن المده خلال تقديمك ع الUN
س...⚘
مقابله المحلف تخوف
ج....
للي عنده قصه حقيقيه واموره مضبطها لايخاف
س...⚘
اكو اعاده بمقابله المحلف..؟
ج...
اي نعم لحالات قليله
س...⚘
يوجد رفض بمقابله المحلف..؟
ج...
اي نعم
لكن ايضا لحالات قليله
س...⚘
ممكن اطير نصف العائله ونصفها لا..؟
ج...
اي نعم حسب الربط بين الملفات
س...⚘
مقابله المحلف يصير اضيف معلومات ع القصه
ج...
حسب المعلومات لكن الافضل ان مضيف شي بعد لان وصل الملف للحسم
س...⚘
يصير اسافار بدون دوره تثقيفيه
ج...
عادي ممكن
س...⚘
الجكش منين استلمه
ج...
من امنيات محافظتك
س...⚘
ممكن اني بالمطار يرجعوني
ج...
ممكن لكن لحالات قليله جدا جدا
مو شرط كل اللاجئين تمر عليهم كل المقابلات المذكوره
يوجد فقط الاساسيات
فسفوره
ICMC
محلف
💛💜💛💜💛💜💛💛💜💛💜💛💜💛
واسف ع الاطاله بالشرح
اعرف تعبتوا يمكن ومليتوا من القراءه
لكن الموضوع حبيت افصله الكم وحاولت اختصر بي قدر المستطاع
مع تقديري للجميع
● اعمل مشاركة لصاحبك خلي يستفاد
■ اذا تحب يوصلك اشعار بكل مقالاتي اعمل متابعه للموقع وحيوصلك اشعار بكل شي انزله ان شاء الله
ليست هناك تعليقات:
إرسال تعليق