موضوع اليوم حول (حقيبة السفر لامريكا 🇺🇸 )
🤝 اسعد الله اوقاتكم بكل خير 🤝
الاخوة الي ينزللهم طيران للولايات المتحدة الامريكية 🇺🇸 اكثر شي محيرهم هو حقائب السفر يكلولي شكد نكدر نجيب شكم جنطة ويانه وكم كيلو نشيل ويانه وهل نستطيع ان نجلب حقائب من عدنة وشنو نكدر نجيب ويانه وهواي تفاصيل حشرحها بالتفصيل تابع وياية
مبدئيا السفر الى الولايات المتحدة الامريكية 🇺🇸 قانونها كل مسافر اله حق ثلاث جنط جنطتين حجم كبير للشحن وجنطة حجم صغير الي هي الهاند باك اشيلها وياك داخل الطيارة ومجموع الوزن المسموح الك على الشخص الواحد البالغ من العمر من سنتين وفوك 51 كيلو
يعني انت اذا جان عمرك اكبر من سنتين الك حق تشيل وياك 51 كيلو غرام
اما الي اقل من سنتين عمره ميحقلة بالبوردنك مالته ممنوع يشيل وزن عدى عربانة مالته تنشحن وما تعتبر من ضمن الوزن
هاي الي الة حق بيها الطفل الي عمره سنتين وجوة يعني اذا عندك اربع اطفال فـ انت تشحن عرباينهم مجانا
نجي على العمرة اكبر من سنتين
كلنة فوك كل واحد حقة ثلاث جنط
جنطتين + جنطة
الجنطتين الكبار هاي تنشحن داخل الطيارة
كل وحدة اشيل 23 كيلو غرام لازم يعني مجموع الجنطتين الشحن 46 كيلو
والجنطة الي داخل الطيارة الهاند باك 5 كيلوات
هنا تسالني الشحن الكبار الاثنين شلون لازم شكلها
حجم وشكل الجنطة الشحن مو مهم اذا كانت الجنطة ام الجروخ او بدون جروخ عادي اذا كانت شوية اكبر جدا جدا عادي ولا تقلق لو طولها بطولك وبالرغم ابو الدورة التثقيفية 👨🏫 محددلك بالسانتيم بس معليك بي
المهم مزيد عن الـ 23 كيلو للحقيبة الوحدة
طبعا كل جنطة 23 كيلو غرام حصرا نص كيلو مزيدون واذا زاد ولو كيلو واحد يكلولكم هسة فرغوه وشمروه بـرة
هنا تسالني الهاند باك شلون لازم شكلها
الي أصعدها وياك بالطيارة
شكل جنطة الهاند باك داخل الطيارة مو مهم لكن حجمها هذه مهم لان الخانة الي فوك الكرسي مال الطيارة محدده بمقاسات هنا تكلي شكد المقاسات ؟
56 سم إرتفاع، 36 سم عرض، 23 سم عمق
اما ك شكل ولون اذا كانت الجنطة ام الجروخ او بدون جروخ عادي
والحجم لازم 5 كيلوات هاي هم محدديه لكن اذا شلت اكثر ماكو مشكلة
حتلو 11 كيلو عادي جدا طبيعي
هنا تكلي شلون خاف يفرغوها غصب
احب اكولك عزيزي الشحن صح لازم تتقيد بـ 46 كيلو لكن الهاند باك جدا عادي وانطيكم دليل احد الاخوة سافر للولايات المتحدة الامريكية 🇺🇸
شوفو شايل اكثر من 5 كيلوات وعبر جدا طبيعي بالهاند باك
لكن خوفتك من الشحن لو نص كيلو يكلولك شمر بالشارع فـ احذر
——————————————————
ملاحظة مهمة لحاملي حقائب السفر
1 - من تخلص من ضب أمتعة جنطتك وتخلي الغراض كلها غلفو جنطكم كلها بجيس نايلون طبعا هذه الجيس ينباع بالأسواق طبيعي اشتري رولات وسعره رخيص الة فائدة مهمة يحافظ على الجنط من الشق يحافظ على الجنط من السرقة تعرفون عمال ممكن يفتحوها شي وهم الها فائدة حتى تعرفها وتلصق عليها اسمك اني انصحكم من البيت غلفوها
بعد ما توزن جنطتك والوزن بالقياسات المطلوبة وتتأكد انها ممخترقة الحد الطبيعي و متاكد من الوزن 100 % يعني متاكد من جنطك وزنها من المطلوب منك اي كل جنطة 20 كيلو وجوة فغلفها بالبيت واذا كنت ممتاكد من الوزن فـ بالمطار غلفها
بالمطار ايضا يوفرولك نايلون بس انصحكم ابتعدو عن نايلون المطار لان غالي و ع المتر يحسبوه عليكم
نصيحة انت بالبيت تشتري رولة وشريط شفاف عريض وتغلقها لان نايلون المطار غالي يكلفك هواي دولارات انت اشتري رولة من السوك على الامتار
ولا تكولي شلون خاف تتفتش الجنطة متتفتش ومتنفتح الا اذا شكو بشي خطر مثلا مسدس او كلاشنكوف لان هم حيدخلوها بسونار ويبين كل شي بس كلتلك من البيت قبل لا تغلغها تاكد من الوزن هاي اهم شي
انت الجنط مالتك من تسلمها بالكاونتر مراح اشوفها بالترانزيت اذا كانت رحلتك بيها ترانزيت مثلا
ان كان ترانزيتك مثلا طيارتك من عمان لنيويورك وانت ولايتك واشنطن سياتل وتحتاج طيارة داخلية ثانية
بنفس اليوم فـ هم مراح اشوفها للجنط الا بسياتل يالله اشوفها
بحالة وحدة تسلم الك الا بحال انك تبات بالمحطة الاولى يعني ترانزيتك مو نفس اليوم تبات بالولاية الاولى الي نزلت بيها ويخلوك بفندق يالله ينطوك الجنط
2 - حاول لا اشيل 20 كيلو راس بالراس ترى احيانا ميزان المطار يخطأ يزيد نصف كيلو للاحتياط حاول اشيل 19 ونص كيلو للحقيبة الواحدة
3 - هنا تكلي شلون اوزن الجنط اشترو ميزان زئبقي وقيسو وزن جنطكم او الكتروني صغير الحجم
4 - ترى الاسواق هناك عامرة والمساعدات الي توفرها الحكومة الامريكية 🇺🇸 والمساجد مو قليلة مو اجيب وياك بطانية وجراجف هناك اشكال واللوان واسعار رخيصة وارجع واكول تجهيز المساجد والحكومة مو شي قليل حرامات تبهذل روحك
5 - اخذ وياك أغذية جافة مُكيسة الجاهزة ( كالبسكت والعلج و النساتل )
هذه الأغذية مهمة حيل طول مدة الرحلة , خصوصا للاطفال تخلص من بجيهم وجوعهم تعرف طريق طويل وحتى الاكل الي يقدموه مو كافي
ترى طريق 12 ساعة يشلعون كلبك
——————————————————
الممنوعات والمسموحات داخل جنطة الهاند باك
🔴 الممنوعات من دخول الطائرة
1 - اي شي سائل ممنوع ( مي , عصائر , شاي مثلج وغيرها ، طرشي )
و الجلات مال شعر و الدهن والشامبو و المعاجين
( كمعجون الأسنان و المراهم مثلاً )
2 - أي آلة حادة أو جارحة مهما كانت حتى لو كانت مبرد أضافر أو مقراضة أو درنفيس أو سجينة
3 - الأكل غير المحفوظ في أكياس جاهزة اللفات المحضرة في المنزل
4 - أي جسم زجاجي بطالة مي وغيرها غازية
5 - الأدوية ممنوعة اذا بدون تقرير طبي او راجيته
من الطبيب الخاص من المستشفى والطبيب لازم يكتب ان هذه المريض يحتاج هذه العلاج اثناء الرحلة
6 - الابتوب والأيباد وكل الأجهزة اللوحية وما اقصد الموبايلات اقصد الكبار
7 - حيواناتك الشخصية ممنوعة لكن اني منزل شرح عن كيفية نقل الحيوانات لدول الاستيطان ع حسابك
🔴 المسموحات من دخول الطائرة
1 - الملابس
2 - الأحذية
3 - الأغذية الجافة المُكيسة الجاهزة ( كالبسكت والعلج و النساتل )
4 - حليب و رضاعة الأطفال
5 - الحفاظات
6 - ألعاب الأطفال غير الصاخبة
7 - الفاكهة والخضروات ( على أن يتم إستهلاكها أو رميها قبل دخولك للولايات المتحدة الامريكية 🇺🇸 أي لغاية نزولك في أول مطار امريكي وقبل مقابلة سلطات الگمارگ لأنه غير مسموح إدخال الفواكه و الخضروات للولايات المتحدة الامريكية 🇺🇸 )
8 - البور بنك الشاحن النقال مال تليفون ممنوع ادخاله بجنطة الشحن اذا زاد عن 10.000 امبير فـ
اذا موجود بجنطه الكبيرة مال الملابس ياخذوا بالمطارات
لكن اذا شايله بيدك بالجنطه الهاند باك عادي
لان يخافون من لحظه انفجار غير مسيطر بالجنط مال شحن بس اذا بالهاند باك بيدك فـ مسيطر عليه
9 - الكتب والمجلات
10 - الأجهزة الكهربائية
——————————————————
نبدي هنا فقرة السين والجيم
1 - سؤال / الهاند باك مسموح ندخل كل شخص جنطة ويا لكن يصير نشيل غير جنط مثلا غيتار
الجواب / نعم تكدر اشيل جنطة اخرى مثلا غيتار وياك وعادي جدا ولازم تخليها بالبداية داخل جنطة الهاند باك يعني كلها جنطة وحدة حالك حال النسوان عادي من يشيلون جنطهم النسائية داخل الطيارة لكن داخل الجنطة الرئيسيّة الهاند باك مو ثنين اصير ممنوع
2 - سؤال / يصير نشيل ويانة ادوية ويانة داخل الطيارة او بالشحن
الجواب / داخل الطيارة عادي اشيل وياك ادوية مثلا بالهاند باك بس تخليها بجيس ابيض وبشرط وياها الراجيته مثلا انت مريض وصحتك تتطلب كل ثلاث ساعات كبسول براسيتول او حباية تحت اللسان هنا عزيزي تخلي يجيبك راچيته تثبت انك تحتاج هذه الدوة وهل راجيته بيها اسمك وتثبت انك مريض وجاي تستخدم هل دوة عادي يصعدوه وياك بالطيارة أما اكو عراقيين يريدون يجيبون وياهم ادوية كمية فـ قانونا ممنوع لكن انت خليها بحقيبة السفر الشحن اي كمية تعبر عادي
3 - سؤال / شكد نكدر نجيب ويانة جكاير كم تكة
الجواب / كل شخص الة حق ثلاث تكات جكاير هاي قانونا احجيلكم اما اذا انت خالفت القانون وشلت اكثر فبعد بكيفك بالمناسبة اكو شالو اكثر ومشة وضعهم ها انتبه بجنطة الشحن مو الهاند باك !
4 - سؤال / اني حقي 43 كيلو غرام اخليها بجنطتين كبار يصير الجنطتين الكبار الي هي 43 كيلو ما اسويها جنطتين اسويها اربع جنط وكل جنطة 10 كيلوات
الجواب / لا ميصير حقك جنطتين فقط !
5 - سؤال / يصير نشيل ويانه البهارات مال جدر
الجواب / اي عادي يصير بس بالجبيرة مو بالهاند باك والأفضل اشترو البهارات ماركة ومكتوب عليها الاسم يعني مثلا تشتري سماق من السوك مسلفن ومكتوب عليه سماق
6- سؤال / بالنسبه للفلوس شكد نكدر ناخذ ويانه
الجواب / الفلوس حقك اجيب وياك على كل كيس نمبر 10.000 دولار اي دفتر اما اذا فلوس اكثر لازم تبلغ موظف ال IOM انو انت شايل فلوس اكثر من شدة يسوولك اوراق بيها هاي قانونا اما انت اصعده وياك وتعبره مثل ما البعض سووها فعادي هواي سووها كل كيس نمبر يعني كل الـ TU او IZ او JO مو كل نفر ركز
7- سؤال / اني ما اكدر اسحب جنطتين يصير اجيب وياية جنطة وحدة جبيرة واخلي بيها 46 كيلو بدل جنطتين
الجواب / لا ميصير
8 - سؤال / اني اخاف الامن يفتحون الجنط ويشوفون الادوية او غير امور او النايلون مالتي يشكوه شلون عفية
الجواب / انت الجنط مالتك ولا راح تتفتش التفتيش مالتها يكون بالشاشة مو يدوي الا بحال شكو بشي متفجر او شي خطر
9 - سؤال / اني عندي عطور اصلية ومكياجات يصير اخذها وياية
الجواب / نعم يصير بالجنطة مال الشحن
10 - سؤال / اذا شلت اكثر من 23 كيلو ممكن يسامحوني ويمشوها واذا شلت بالهاند باك اكثر من 5 كيلوات ممكن يسامحوني
الجواب / مستحيل يسامحوك بنص كيلو اذا ع الشحن اما الهاند باك اي يسامحوك
11 - سؤال / اني اذا اكثر من 23 كيلو اكدر ادفع فلوس واشتري وزن إضافي بالمطار
الجواب / ماكو شراء وزن ابدا بالمطار يعني ماكو اذا اكثر من الوزن تدفع فلوسها مثل الرحلات العادية
12 - سؤال / يصير ندز غراضنا الزايده من خلال شركات نقل مثل DHL وغيرها
الجواب / اي نعم عادي
13 - سؤال / عندي بزونة يصير اخذها وياية للولايات المتحدة الامريكية 🇺🇸 يصعدوها بالطيارة
الجواب / ممنوع اطلاقا اصطحاب الحيوانات لكن ع حسابك
14 - سؤال / يصير ناخذ ويانه لابتوب او ايباد
الجواب / اي عادي بس لازم داخل الشحن بالهاند باك داخل الطيارة ميصير
15 - سؤال / اني عندي ذهبي الخاص مجوهراتي كلايد ومحابس عادي من ناحية المطار والتفتيش واكدر اشيلها
الجواب / بخصوص الذهب والمجوهرات فعادي جدا جدا تلبسه ومهما كانت كميته شكد ما تكدر جيب حتلو متلبسه وتكدر اشيلة بالجنطتين ومياثر عليك نهائيا
لكن السبائك الذهبية لا وضعها يختلف ولازم تبلغهم بيها لان تعتبر مثل الفلوس
16 - سؤال / بخصوص الجنط لو تنزل للسوك راح تشوف اغلب المعروض بالمحلات الستندر طول + العرض+ الارتفاع = 170 ..... واكو الحجم الوسط 130 واكو الحجم الصغير هذا يعتبر هاند باك ... يعني ممكن الواحد ياخذ من الكبار عادي يمشوها ... ﻻن الكل يعاني من تضارب الوزن مع الحجم ... عندك ملابس حجمها كبير لكن وزنها 10-12 كيلو .. حرامات يروح الوزن هيج
الجواب / وضحت فوك الحجم ابد مياثر مهما كان حجم جنطتك مياثر حتلو عملاق لكن الهاند باك الوضع يختلف لان اكو رف اخلي بي الجنطة اذا الجنطة مطب بالرف شلون تخلي الجنطة بحضنك 12 ساعة 😆
17 - سؤال / وصلت أشخاص لمطار اسطنبول جان عدهم طيران ✈️ لاستراليا 🇰🇾 طلع عدهم وزن زايد دفعوا غرامة 500 دولار شلون كدامي دفعو وهسة انت جاي تكول ميصير
الجواب / استراليا 🇰🇾 ع المكريشن عادي لان باعتبار ع حسابك لكن الـ UN الـ IOM تختلف سفرتها
18 - سؤال / اني عندي ضغط ولازم أخذ الحبوب مال الضغط وحبوب المفاصل شلون بهل حالة واني كل ثلاث ساعات لازم استخدمها
الجواب / جيب راچيته من الطبيب مالتك يثبت انك تحتاجها وعادي
19 - سؤال / اني عندي جهاز تنفس اخذه ويايه لان اني عندي قلب واحتاج هذا شي
الجواب / جدا عادي يصعد وياك بالطيارة المهم جيب ما يثبت ان صحتك تحتاجه
20 - سؤال / كم ابعاد الجنطة المسموح السفر بيها وكم اكبر حجم للجنطة مسموح بيها لان عندي جنط كبار حجم الواحدة 174سم هل مسموحة اذا اشيل بيها كل وحدة 23 كيلو فقط
الجواب / كتبت فوك مو مهم الشكل والحجم المهم الوزن مهما كان الحجم عادي
21 - سؤال / بالنسبة اني عندي سكر وأخذ انسولين شلون لازم اخذ ثلج وياية يعني حتى بالطياره الآن سفر لامريكا 🇺🇸 طويل عادي
الجواب / جدا عادي المهم قدم دليل انك تحتاجه
22 - سؤال / الي عندة بعض الانتيكات القديمة من البرونز او بقية المعادن وهي عزيزة عنده ولا يمكن ان يفرط بهذه الاشياء ويريد ان يأخذها معه يصير لو ميصير
الجواب / اي جدا عادي يصير وبالجنطتين
23 - سؤال / اذا عدنا اوراق ومستمسكات ممقدميهن للـ الـ UN او الـ IOM يعني تناقض قصتنا بس اريد اخذهم ويايه وين تنصحني اخليهم بلهاند باك لو بلجنط الكبيرة وممكن يفتشون وياخذون نسخه منهم او لا
الجواب / بالشحن نصيحة
24 - سؤال / اكدر اخذ ويايه بلي ستيشن لو شاشه مال تلفزيون صغيره مال ابني حيل حاير بيها
الجواب / اي تكدر عادي وبالجنطتين بالهاند وبالشحن
25 - سؤال / اذا عائلة كل شخص بالعائلة يحقله جنطتين ام 23 كيلو لو جنطة وحدة ام 23 كيلو
يعني العائلة اذا 5 نفرات 10 جنط من حقهم او 5 ام 23 كيلو
الجواب / العائلة 10 جنط كل واحد جنطتين شحن
26 - سؤال / بالنسبة للمبلغ 10000 دولار لكل شخص بالعائلة من حقه هذا المبلغ لو العائلة بأكمله فقط 10000 دولار
الجواب / كل كيس نمبر الة حق 10000 دولار امريكي يشيل
اتمنى الشرح اعلاه كان كافي ووافي
ودمتم سالمين 👍
ليست هناك تعليقات:
إرسال تعليق