انت لاجئ اين ما كنت هذة المعلومات تهمككل ألاخبارلاجئي تركيا
كثرة الاسئله حول الاردن ارخص من تركيا ...أقراء وانت تعرف ...مهم
اسعد الله اوقاتكم بالخير والرحمه
نظرا لكثره السؤال حول الدعايه لي سامعيها بعض الاخوه انهو الاردن رخيصه جدا وبفلس ونص وبـ 300$ تعيش انت وعائلتك
خصوصا من العوائل لي دتريد تجي بالجديد وتقدم ع الـ UN او من الاخوه لي متاخرين هناا بدون اي مقابله وديفكر
ينقل ملفه لـ《 الاردن 》
سامع على اساس اسرع وافضل من تركيا او غير دوله
اخواني الغاليين مقدمه الشرح وقبل ماابين حقيقه المساوىء بالاردن
خلي بالك
لايوجد دوله اسرع من دوله باللجوء خصوصا بالنسبه لدول
تركيا _ عمان _ لبنان
هاي ال3 دول نكدر نعتبرها افضل الدول واكبرها من حيث استيعاب اعداد كبيره للاجئين خاصه العراقيين والسوريين
بالنسبه للدعايات المنشره حاليا
يوجد كم شخص دينشر بهدف المساعده لكن للاسف الشديد
اغلب الناس ناسيه المثل الشعبي والي هو
الشبعان ميعرف بحال الجوعان
البعض ديشجع الناس على الاردن وديصورها انها رخيصه حيل وافضل من تركيااا
طبعا حشرحلكم عن حال المعيشه هناك وحبين الاختلاف عن تركياا
بس احب انوه على انهو لا تركيا ولا الاردن ولا اي دوله ثانيه هي ملك شخصي الي
اني حشرح بلي يملي عليه ضميري ولي عايشه وشايفه
الاردن غاليه حيل ومستحيل يكدر الواحد متواصل بالعيش بيها بدون حواله
طبعا حسب موصلتني بعض المسجات والي سامعين على اساس الحياة هناك بفلس ونص
🔴 اولا الأيجار
للي مصورلكم انهو الاجار بـ 200 دولار شقه مرتبه ومكان زين وغرفتين وصاله يعني تقريبا مصورلك المنطقه كانمى باسطنبول
فهذا للاسف تصوير خاطىء وماكو هيج حجي
هاي الشقه صح حتلكاها لكن بمكانات بعيده ومناطق شعبيه وقديمه
🔴 المعيشه والمصرف للعائله
اكبر جريمه من يصورولك العائله مصرفها 100 دولار بالشهر بالاردن
هاي الـ 100 دولار الي يحجون عليها بالله متكفيك يمكن مال ببسي ع مدار الشهر
اقل شي اقل شي العائله تصرف 400 او500 دولار هاي اضعف الاحتمالات والله
لان عمان غاااليه حيل ولي ميصدك
خلي يفتح يوتيوب ويفوت يبحث بالتقارير الاقتصاديه عن مستوى معيشه الفرد بالبلدان العربيه وخلي يشوف العيشه مال اردن شنووو ويشوف المصرف شنو
فحرام عليكم تورطون العالم وعيب عليكم
اي دوله بالعالم هسه مستحيل ان تعيش بـ 100 دولار العائله كلها بالشهر واتحدى اي واحد
اما هنا بتركيا فتكدر العوائل ان تقتصد وتعيش بـ 300 دولار
بس مع ذلك هاي العيشه صعبه ولتصورون سهله
🔴 الرواتب
خاف مصوريلكم الفلوس والرواتب من الـ UN مطر على راس اللاجئين
فالله وكيلكم حالها حال الراتب لي ينطو الـ UN
بالاردن لازم شروط ومو كل واحد ينطو والراتب شي قليل لا يشبع ولا يغني من جوع
فلحد يخلي باله حيعيش من الراتب
🔴 المساعدات الغذائيه من الجمعيات الخيريه
هاي المساعدات حالها حال لي يوزعوها بتركيا مال IHH
والكزلاي وغيرها من الجمعيات
لازم هم شروط وقوانين مو ياهو الجاي يحملووو ويكلوله بالعافيه
🔴 بالنسبه للسرعه بالسفر
لايوجد اي شي يثبت انهو الـ UN اسرع من غير دوله
كلنا دنشوف كنا العام شكد ناس سافرو من كل الدول سواء تركيا او عمان او لبنان او حتى العراق جماعه الـ IOM
لكن من اجه ترامب سوه خربطه بسبب قراراته
وكلنا نذكر بالـ 2015 من وكفو الـ UN فتره بعمان وعلقو بعض الملفات لفتره
لكن كل لي يفرق حاليا هو وجود محلف بعمان وحاليا متوقف بتركيا لكن هذا مو يعني عمان اسرع
هاي الحاله بسبب الخربطه مال قرارات اللجوء لا اكثر ولا اقل
🔴 التعليم
المدارس هناك بفلوس
🔴 العمل
مالك حق العمل ولي يلزمو ديشتغل ركض يلزكو بغرامه ماليه مابيها اي نقاش او رحمه او تساهل
بينما بتركيا صح العمل هم ممنوع لكن الناس كلها تشتغل وعايشين صار سنوات والناس مغلسين
🔴 الحوالات
من المستحيل يوجد فرد او عائله عايش بالاردن معتمد بس على الشغل بدون حواله بينما بتركيا اكو هوايه شباب معتمد على نفسه وعايش وبالنسبه للعوائل يوجد بعضهم عايشين بس على الشغل
لان وين متروح لاي دوله انت غريب واكيد محتاخذ حقك من الشغل كامل واكيد حيضغطون عليك بالعمل وساعاته
فصعب تعتمد بس على الشغل لازم عندك مورد او كم فلس وياك
🔴 الجو
نفس الجو اذا بتركيا او الاردن وبارده وثلج
🔴 بالنسبه للارض المباركه
فأحب انوه على ان كل الارض والسماوات والبحار والجبال لله وحده
ليش شنو الاردن نكلبت مكه لو المدينه المنوره ...!
فهاي الامور لاتقدم ولا تاخر بالسفر
والزين لنفسه والموزين لنفسه
وبالنسبه للي بتركيا او اي بلد ثاني ويصيح ويعيط اريد انقل ملفي للاردن او لاي دوله ثانيه حتى يمشي الملف
احب اكلك اكعد واسكت لان حتنام عليك طابوكه اذا نقلت الملف وحتبدي من جديد
🔵 من الامور لي يستحسن ذكرها
- بالاردن او اي دوله عربيه
المجتمع عربي واكيد عامل اللغه يخدم الناس بالتواصل مع المجتمع لكن بتركيا لازم تتعلم لغه
- بالاردن لايوجد اجبار بالسكن والعيش بمحافظه وحده
لكن بتركيا تكون ملزم بالسكن بالمحافظه لي يحددها الـ UN الك
- بتركيا يوجد شي حلو ( مستقبلا)
حتى اذا باجر عكبه محصلت لجوء وفرضا فرضا انطوك توطين بتركياا
من حتحصل الجنسيه التركيه تستفاد تكدر ركض تاخذ فيزا لاي دوله اوربيه وتسافر
--------------------------------------------------
اما بالنسبه لدول الهند وماليزيا واندنوسيا ومصر وغيرها من الدول لي بيها مكاتب الـ UN
اغلب الناس يكول ليش ذني الدول متفيد او هل الـ UN بيها سريع او بطيء
هاي الدول يااخوان ليش يكون الـ UN بيها بطىء ونشوف الناس ( العراقيين والسوريين ) يتاخرون بيهاا سنوات طويله
والسبب هو بعدها عن البلد الام
فهاي الدول يكون الها الاولويه لجنسيات ثانيه من نازحين ومهاجرين من الدول المجاوره لي بيها اعمال اضطهاد وحرب
هاي جانت اهم الحقائق والتوضيحات حول الاردن وردا ع الدعايات والاشاعات لي ناشريهاا
ويارب اكون افدتكم
🔴 اعمل مشاركه خلي اخوك او صاحبك يستفاد..
🔴 اثبت تفاعلك بالتعليقات
🔴 اذا تحب يوصلك اشعار بكل المقالات والمواضيع الي تنزل بالموقع، اعمل متابعه للموقع بالاسفل اكتب ايميلك وسوف تتلقى اشعار بكل شي انزله ان شاء الله
مع تحياتي وتقديري للجميع
ليست هناك تعليقات:
إرسال تعليق